Nikotin er eitt eiturevni, sum verður upptikið gjøgnum lunguni, slímhinnurnar og húðina. Tað verður flutt við blóðinum til heilan og restina av kroppinum. Nikotin er sera bindandi, á sama hátt sum kokain er bindandi. Tí er tað sera tórført fyri ung, at leggja av og vandin er størri hjá teimum, tí heilin framvegis er í menning. Nikotinnýtsla kann millum annað hava neiliga ávirkan á hugsavnan, sálarliga trivnaðin, hjarta og blóðrensl, og eisini á tenn og tannkjøt, um tey snúsa.
Foreldur hava stóran týdning fyri, hvønn hugburð børn og ung hava um royking og nikotin. Tá foreldur vísa greitt, at sigarettir, vapes, snús og aðrar nikotinvørur ikki eru fyri børn og ung, minkar vandin fyri, at børnini fara at royna ella brúka tað.
Tí er tað umráðandi at tosa við barnið um nikotin – eisini áðrenn tað sjálvt møtir hesum vørunum.
Hvat ger nikotin við kroppin?
Tá børn og ung brúka nikotin, kann tað elva til varandi mein í heilanum. Heilin er nevniliga ikki liðugt mentur fyrr enn um 25-30 ára aldur. Til tá er heilin serliga viðbrekin fyri ávirkan uttanífrá, eitt nú fyri rúsevnum so sum nikotini, ið kann elva til varandi mein í unga heilanum. Skaðiliga ávirkanin snýr seg serliga um trý viðurskifti: bundinskap, hugsavnan og sálarsjúku.
- Nikotin er líka bindandi sum kokain, so tú kanst ikki bara gevast, tá tú vilt. Nikotin økir eisini vandan fyri bundinskapi at øðrum rúsevnum, og um tú hevur brúkt nikotin á ungum aldri, verður natúrligari at leita til rúsevni alt lívið.
- Tá tú brúkar nikotin, kennir tú gamaní eitt hert fokus eina stutta løtu, men tá tú hevur brúkt nikotin í longri tíð, fjarar tann ávirkanin burtur, og vandi er fyri, at tú fært varandi trupulleikar at hugsavna teg, eisini langt eftir, at tú ert givin.
- Tá tú hevur tað trupult, kann hugurin til nikotin vaksa, tí tú verður glaðari eina lítla løtu. Nikotin hevur tó eisini við sær, at tú verður meira viðbrekin fyri ávirkan av strongd, og tú ert í størri vanda fyri at fáa tunglyndi ella angist.
