Dagstovnar – ein týðandi liður í fyribyrgjandi arbeiðinum hjá SSP.

1. januar 2018 kom í gildið, at dagstovnar eisini skuldi verða ein partur av fyribyrgjandi arbeiðinum hjá SSP. Hetta er eitt stórt lop í mun til fyrstu árini hjá SSP í Føroyum, har tað mestan mun var arbeitt við næmingum í framhaldsdeildini og síðani frá skúlabyrjan. Tí fáa dagstovnarnir eisini stóran týdning sum samstarvspartur í virkseminum hjá SSP frameftir. Menningin av SSP-samstarvinum hevur so hvørt gjørt, at virksemið er komið í eina fasta og trygga legu við eini greiðari ætlan, ið arbeitt verður eftir. Hetta er sjálvsagt eisini neyðugt, nú virksemið er partur av einum miðvísum arbeiði, sum ein rúgva av fólki kring landið eigur sín góða lut í.

Á myndini undirskriva teir fýra samstarvspartarnir dagførda sáttmálan: John Kølbæk, politimeistari, Eyðgunn Samuelsen, landsstýriskvinna í almannamálum, Dennis Holm, formaður í Kommunufelagnum og Rigmor Dam, landsstýriskvinna í mentamálum.

Partur av einari norðurlendskari visión

Hetta er fullt í tráð við visiónir og vegleiðingar frá norðurlendska vælferðastovninum, ið hoyrir til Norðurlandaráðið at tryggja, at børn og ung í norðanlondum koma væl undan. Ásanna verður at tey fakprofesionellu, ið arbeiða í fremstu røð, sum námsfrøðingar og lærarar, hava eina tí størstu ávirkanina á trivnaðin hjá børnum og ungum.