Endamál

Endamálið við SSP-samstarvinum er at byggja upp, brúka og røkja faklig netverk, sum hava eina mennandi ávirkan á gerandisdagin hjá børnum og ungum. Við at skipa fyri mennandi og uppbyggjandi átøkum fyri hesar aldursbólkar, verður eisini slóðað fyri einum góðum barna- og ungdómslívi.

Ásannandi, at lívsførleikar okkara verða mentir í felagsskapi við onnur, verður dentur lagdur á, at øll børn og ung koma upp í part og saman við øðrum fáa treysti og mótstøðuføri, ið so hvørt ger tey til ábyrgdarfullar samfelags-borgarar. Hetta er samstundis besti hátturin at byrgja fyri eini óhepnari kós, sum kann elva til lógarbrot og skaðandi atburð millum børn og ung.

Almenningurin er ein sera týðandi viðspælari hjá SSP-samstarvinum, og eigur virksemið tí
eisini at venda sær til foreldur og onnur, ið standa barninum nær.

Arbeitt verður í trimum stigum:

Alment: Arbeitt verður á ein hátt, ið kveikir hugburðin hjá børnum og ungum, og sum mennir teirra førleikar at velja rætt.

Serstakt: Arbeitt verður málrættað við bólki av børnum og ungum, sum eru ávegis ella á markinum til at fremja lógarbrot, og sum eru ella eru í ferð við at koma sær í trupulleikar.

Einstaklinga: Arbeitt verður við einstaklingum, sum hava framt lógarbrot ella hava álvarsligar trupulleikar at dragast við.

 

Í samstarvinum eru:

• Barna- og útbúgvingarmálaráðið:
  Fólkaskúli, miðnám, dagstovnar/ Sernám, barnavernd
• Føroya Landfúti:
  Politiið
• Kommunufelagið:
  Dagstovnar/ dagrøkt/ frítíðarskúlar/ barnaverndarstovan/ barnaverndartænastur/ sosialar deildir/ námsfrøðiligar ráðgevingar/ virkis- og ungdómshús

Starvsnevndin

Jenny Lydersen – BUMR
Maria Michelsen – BUMR
Mariann Reinert – Politiið
Eyðun Christiansen – KF

SSP-ársfundurin hevur yvirkipaðu ábyrgdina av samstarvinum. Á ársfundinum luttaka avvarðandi landsstýrisfólk, formaðurin í Kommunufelagnum og Føroya Landfúti.

Ársfundurin verður hildin í mai.

Starvsnevndin, ið hevur umboð fyri avvarðandi myndugleikarnar, hevur til uppgávu at gera uppskot til stevnumið og virkisætlan, sum SSP-ársfundurin góðkennir. Harumframt skal starvsnevndin seta í gongd og eftirmeta tað fyribyrgjandi arbeiðið við støði í stevnumiði og virkisætlan.

Arbeiðið verður skipað við eini ráðgeving, ið húsast saman við umsitingini hjá Kommunufelagnum. Starvsnevndin hevur ábyrgd av at seta leiðara fyri ráðgevingina. Leiðarin hevur til uppgávu at skipa SSP-arbeiðið og menna hugskot til fyribyrgjandi arbeiðið.

Virkisætlanin er grundarlagið fyri arbeiðinum hjá SSP. Starvsnevndin hevur hvørt ár til uppgávu at gera uppskot til stevnumið og virkisætlan, sum SSP-ársfundurin góðkennir.

 

Heinta árligu virkisætlanirnar sum PDF:

• SSP virkisætlan 2024 – 2025
• SSP virkisætlan 2023 – 2024
• SSP virkisætlan 2022 – 2023
• SSP virkisætlan 2020 – 2021
• SSP virkisætlan 2018 – 2019
• SSP virkisætlan 2017 – 2018
• SSP virkisætlan 2016 – 2017
• SSP virkisætlan 2015 – 2016
• SSP virkisætlan 2014 – 2015
• SSP virkisætlan 2012 – 2013
• SSP virkisætlan 2010 – 2011

Uppgávan – Ráðgevingin

SSP- RÁÐGEVINGIN

Høvuðsuppgávan hjá ráðgevingini er at samskipa SSP- arbeiðið og menna hugskot til fyribyrgjandi arbeiði, og fevnir hetta millum annað um:

1. At vera sambindingarlið og kveikjari millum leiðslubólk, samskipanarbólk og økisbólkar.
2. At ráðgeva og vegleiða stovnum um fyribyrgjandi arbeiði.
3. At skipa fyri undirvísing og upplýsning fyri børnum, ungum, foreldrum og øðrum í sambandi við fyribyrgjandi átøk.
4. At standa á odda fyri fakligari menning í sambandi við útgreiningar, átøk og nýhugsan um fyribyrging.
5. At savna hagtøl og skjalfesta vitan.

Uppgávan – SSP-lærarin

Skúlin er helst týdningarmesti pallurin í SSP-samstarvinum, og allir skúlar hava tilknýtið til ein SSP-lærara. Uppgávan hjá SSP-læraranum er yvirskipað at arbeiða við trivnaði og fyribyrging á øllum floksstigum í einstaka skúlanum.

SSP-lærarin hevur ávíst tímatal hvørja viku, sum verður nýtt til SSP-arbeiði. Tímatalið verður ásett út frá støddini á skúlanum.

Uppgávurnar hjá SSP-læraranum eru, at:

 

1. Taka lut í fundum í SSP-økisbólkinum og vera sambindingarliður millum skúlan og SSP-økisbólkin.
2. Miðla vitan um SSP-samstarvið í økinum og um tiltøk/átøk til hinar lærararnar, næmingarnar og foreldrini.
3. Vegleiða á skúlanum um tilfar og undirvísing í SSP-høpi.
4. Fylgja væl við tí, sum fer fram millum næmingarnar á skúlanum.
5. Ráðgeva starvsfelagum á skúlanum í einstaklingamálum.
6. Samskipa SSP-átøk á skúlanum.

Uppgávan – Barnaverndatænastan

1. Samskipa virksemið í einstaka barnaverndarøkinum í samstarvi við SSP-ráðgevingina; her í millum fyriskipa og kalla inn til økisfundir við jøvnum millumbilum, sambært nærri ásetingum.
2. Tryggja, at allir luttakandi partar hava ein virknan leiklut í SSP arbeiðinum.
3. Virka ítøkiliga fyri at fremja Mál & Mið, við støði í árligu virkisætlanini.
4. Tryggja, at trupulleikaøki og neilig rák verða eyðmerkt.
5. Miðla vitan um týðandi staðbundin viðurskifti og átøk – her í millum at kunna kommunalu leiðslurnar um virksemið og teir stovnar, sum limirnir í bólkinum umboða, umframt at skipa fyri kunningartiltøkum, tá ið høvi er til tess.

SSP samskipararnir á BVT:

Suðuroy – Unn Michelsen, unn@tvoroyri.fo

Sandoy – Kristina á Reynatúgvu, kristina@bvtsandoy.fo

Tórshavn – Ebba Øre, ebbao@torshavn.fo, og Tine Lyager, tinel@torshavn.fo

Vágar – Jónley Poulsen, jonley@vaga.fo

VEKS – Heidi Høgnadóttir Hansen, heidih@sunda.fo

Skálafjørður – Jákup Foldbo, jakupf@runavik.fo

Eysturkommuna/Fuglafjørður – Ingi Hansen, ingi@fuglafjordur.fo

Norðoyggjar – Ása Vágsheyg Svabo, asav@klaksvik.fo